Жалағаш аудандық орталықтандырылған кітапханалар жүйесінің ресми сайты

Бұқарбай батыр ауылдық кітапханасында «Мейірімділік отбасынан басталады» тақырыбында мүмкіндігі шектеулі жандардың қатысуымен дөңгелек үстел ұйымдастырылды. Іс-шараның негізгі мақсаты – қоғамда мейірімділік, жанашырлық және толеранттылық құндылықтарын насихаттау, отбасының ерекше жандар өміріндегі маңызын көрсету болды. Шара барысында қатысушылар отбасыдағы мейірімділік, қолдау және қамқорлықтың маңызы туралы ой бөлісіп, өз тәжірибелерімен бөлісті. Бұл кездесу – жүректен жүрекке жеткен жылы әңгіме, өзара түсіністік пен қолдаудың айқын көрінісі болды.

Балалар кітапханасында 2 сәуір - Халықаралық балалар кітабы апталығының ашылуы болды. Осыған орай «Кітаптың құпия әлемін бірге ашайық» атты ашық есік күні ұйымдастырылды. Ашық есік күннің ашылуын Балалар кітапханасының меңгерушісі Гүлжанат Жақсылыққызы ашып берді.Іс-шара барысында балалар кітап әлеміне саяхат жасап, қызықты ертегілермен танысты, түрлі әдеби ойындар мен танымдық тапсырмаларға қатысты. Кітаптың адам өміріндегі маңызы туралы әңгімелер айтылып, оқушылардың кітап оқуға деген қызығушылығы арта түсті. Балалар үшін бұл күн ерекше әсерлі әрі пайдалы болды. Кітап – білімнің кілті, рухани қазына екені тағы бір мәрте дәлелденді.

"Бір ел - бір кітап акциясы" аясында жазушы Қабдеш Жұмаділовтың Тағдыр романын оқуға ұсынылды. Осы орайда мектеп кітапханасымен Аққұм ауылдық кітапханасы бірлесе отырып "Қаламгер қалдырған тарихи тағдыр" атты оқырман конференциясы өткізілді. Конференция аясында оқушылар түрлі сұрақтарды талқылады.  Мақсаты: оқырмандарды ұлттық әдебиеттің таңдаулы туындысымен таныстыру, тарихи сананы қалыптастыру, ел тағдыры мен адам болмысы жайлы терең ой қозғау, сондай - кітап оқуға деген қызығушылықты арттыру.

Аудандық кітапханада 8 наурыз – Халықаралық әйелдер күніне орай «Ізгілік бесігін тербеткен, аяулы жан» атты мерекелік кездесу кеші өтті. Кеш барысында аяулы аналар мен ардақты апаларға құрмет көрсетіліп, олардың қоғамдағы, отбасы мен ұрпақ тәрбиесіндегі ерекше орны жайында тағылымды әңгімелер айтылды. Қатысушылар жүрекжарды лебіздерін білдіріп, жылы естеліктерімен бөлісті.

Аудандық кітапханада «Кітапхана саласындағы жасанды интеллект» тақырыбында семинар-тренинг ұйымдастырылды. Семинар барысында қатысушылар жасанды интеллекттің ақпарат іздеу, библиографиялық қызмет көрсету, оқырмандармен байланыс орнату, мәтін дайындау және цифрлық контент жасау бағыттарындағы мүмкіндіктерімен танысты. Сонымен қатар, практикалық тапсырмалар орындалып, жаңа бағдарламалармен жұмыс жасау дағдылары көрсетілді. Тренинг кәсіби біліктілікті арттыруға, кітапхана қызметін заманауи талаптарға сай дамытуға үлкен серпін берді. Қатысушылар өзара пікір алмасып, пайдалы тәжірибелермен бөлісті. Заманауи технология – уақыт талабы. Кітапхана ісін жаңғырту жолындағы мұндай шаралар алдағы уақытта да жалғасын табады.